वार्तातर्फको नयाँ पहल

काठमाडौं । अमेरिकी राष्ट्रपति डोनाल्ड ट्रम्पले इरानसँगको युद्धविरामको समयसीमा थप गर्ने घोषणा गरेका छन् ।

ट्रम्पले इरानी नेताहरूले युद्ध अन्त्यका लागि एकीकृत प्रस्ताव नल्याएसम्म अमेरिकी सेनाले नियोजित आक्रमण रोक्ने तर तयारी भने जारी रहने बताएका छन् । उनका अनुसार पाकिस्तानी मध्यस्थकर्ताहरूको अनुरोधपछि युद्धविराम लम्ब्याउने निर्णय गरिएको हो ।

सामाजिक सञ्जालमार्फत ट्रम्पले लेख्दै अमेरिकी सेनालाई नाकाबन्दी कायम राख्न र आवश्यक तयारीमा रहन निर्देशन दिइएको उल्लेख गरेका छन् । प्रस्ताव पेश नभएसम्म र छलफल निष्कर्षमा नपुगेसम्म युद्धविराम कायम रहने उनले स्पष्ट पारेका छन् ।

यसअघि ट्रम्पले युद्धविराम नबढाउने र इरानका पूर्वाधारमा कडा आक्रमण गर्ने चेतावनी दिएका थिए । तर पछिल्लो निर्णयलाई उनको अडानमा आएको परिवर्तनका रूपमा हेरिएको छ । उनले इरानी नेतृत्वभित्रको आन्तरिक मतभेदका कारण कूटनीतिक प्रयासमा ढिलाइ भएको बताएका छन् ।

इरानले भने यस विषयमा औपचारिक प्रतिक्रिया दिएको छैन । इरानको अर्ध–आधिकारिक समाचार संस्था ‘तस्निम’ ले तेहरानको धारणा पछि सार्वजनिक गरिने जनाएको छ ।

इरानी विदेशमन्त्री अब्बास अराघ्चीले अमेरिकी नौसैनिक नाकाबन्दीलाई ‘युद्धको कार्य’ भन्दै यसले युद्धविरामको उल्लंघन भएको टिप्पणी गरेका छन् ।

पाकिस्तानका प्रधानमन्त्री शहबाज शरीफले युद्धविराम लम्ब्याउने ट्रम्पको निर्णयको स्वागत गर्दै दोस्रो चरणको वार्ताबाट स्थायी शान्ति सम्झौता हुने आशा व्यक्त गरेका छन् ।

फेब्रुअरी २८ मा अमेरिका र इजरायलले इरानमाथि आक्रमण गरेयता धेरै उच्च तहका अधिकारीहरूको मृत्यु भइसकेको बताइएको छ । हाल इरानको नेतृत्वमा परिवर्तन भइसकेको र नयाँ नेतृत्वले औपचारिक प्रतिक्रिया नदिएको उल्लेख गरिएको छ ।

अमेरिकाले इरानको आणविक कार्यक्रम पूर्ण रूपमा रोक्नुपर्ने, मिसाइल उत्पादन नियन्त्रणमा राख्नुपर्ने तथा हेजबुल्लाह र हमासजस्ता समूहलाई सहयोग बन्द गर्नुपर्ने माग राख्दै आएको छ । तर इरानले आफ्नो आणविक कार्यक्रम र सैन्य क्षमतामा कुनै सम्झौता नगर्ने अडान दोहोर्‍याउँदै आएको छ ।